बिहान-बेलुका फोहोर-मैला उठइएको खण्डमा असल रहने नगरवासीको सुझाउ

खरसाङ, (निसं): खरसाङ नगरपालिका क्षेत्रमा नगरवासीको घर-आँगनबाट फोहोर-मैला उठाउने कार्य भइरहेको छ। खरसाङ शहरी क्षेत्रमा आइतवार बाहेक प्रत्येक दिन नगरपालिका कर्मचारीहरू फोहोर-मैला उठाउन आउने गरेका छन्‌‍ भने नगरदेखि बाहिरका वार्डहरूमा हप्तामा तीन अथवा दुई पल्ट फोहोर-मैला उठाउनलाई कर्मचारीहरू आउने गरेका नगरवासीले बताएका छन्‌‍। नगरपालिका कर्मचारीहरू फोहोर-मैला उठाउनलाई अधिक बिहान आउने गरेकाले र अधिक बिहान उठ्न गाह्रो हुने भएको कतिपय नगरवासीको गुनासो छ। यसरी अधिक बिहान उठ्न गाह्रो भएकोले नगरवासीले आफ्नो घर वा दोकानबाट निस्किएको फोहोर-मैला अघिल्लो रात कुनै निर्दिष्ट स्थानमा राखिदिने गरेका छन्‌‍। नगरवासीले यसरी फोहोर-मैला विभिन्न स्थानमा राखिदिने गरेकाले रातिको समयमा खरसाङ शहर लगायत विभिन्न वार्डहरूमा फोहोर-मैलाको थुपारिएको देखिने गरिन्छ। बिहान नगरपालिका कर्मचारीहरूले उठाएर लैजाउन्‌‍ भनी राखिएको फोहोर-मैलामा भुस्याहा कुकुरहरूले खानेकुरो खोजर छरपस्ट पारिदिने गरेको पनि कतिपय समयमा देखिएको छ। रातिको समयमा कुकुरहरूले फोहोर-मैलामा खानेकुरो खोजेर छरपस्ट पारिदिने गरेकाले कतिपय मानिसहरूले अग्लो स्थानमा फोहोर-मैला राखिदिने गरेका छन्‌‍। बिहान नगरपालिका कर्मचारीहरू आएर लैजाउन्‌‍ भनी राखिएको फोहोर-मैला उठाउन कुनै कारणवश नगरपालिका कर्मचारी नआएको खण्डमा दिभरमा फोहोर-मैला छरिएर समस्या सृजना हुने गरेको पाइएको छ। यसैले कतिपय नगरवासीले फोहोर-मैला घर-आँगनबाट उठाउनको निम्ति बिहान अनि बेलुका दुई पल्ट नगरपालिका कर्मचारीहरू पालैसित खटाइएको खण्डमा असल रहने सुझाउ दिएका छन्‌‍। यसरी बिहान अनि बेलुका फोहोर-मैला उठाउन कर्मचारीहरू खटाइएको खण्डमा शहर अनि विभिन्न वार्डमा रातिको समयमा फोहोर-मैला राख्ने प्रथा हटेर जाने मानिसहरूको मत छ। तथापि कतिपय नगरपालिका कर्मचारीले बताए अनुसार अधिक बिहान फोहोर-मैला उठाइएको कारण शहरमा यान-वाहनको बाक्लो चलाचल शुरु हुन अघि नै फोहोर-मैलाको कार्य सिद्ध्याइको हो। बिहान 8 बजेदेखि शहरमा यान-वाहनको चलाचल बाक्लो रहने भएकोले फोहोर-मैला उठाउने काम गर्न सम्भव हुँदैन। फोहोर-मैला उठाएर बाहिर लैजानको निम्ति गाड़ीमा लोड गर्न पर्ने हुन्छ, यातायत बाक्लो भएपछि यसरी जहाँसुकै गाड़ी रोकेर राख्न सकिन्दैन। यसरी नै राति 8 बजेसम्म शहरमा यान-वाहनको चलाचल बाक्लो रहने भएकोले रातिको समयमा फोहोर-मैला उठाउन समस्या हुन सक्छ।