सुन्तलामा झीङ्गाको आक्रमण रोक्न कीटनाशक वितरण

भौगोलिक दृष्टिकोणले कृषि अनि वागवानीको लागि उपयुक्त मानिने मिरिक बस्तीका सुन्तला कृषकहरूलाई सुन्तलामा झीङ्गा कीराको आक्रमणलाई रोक्न आवश्यक सामग्री जीटीए कृषि विभाग मार्फत वितरण गरिएको छ। उक्त सामग्री कृषकहरूलाई मंगलबार जीटीए कृषि एवं वागवानी विभागका एमओडी सभासद मिलेस राई अनि मिरिक कृषि विभागका सह निर्देशिका श्रीमती विभूति रिजालको बाहुलीबाट वितरण गरियो। यस अवसरमा बोल्दै सभासद राईले मिरिक बस्तीका अधिकांश कृषकहरूले सुन्तला खेती गर्ने गरेको अनि हाल सुन्तलामा दाना लाग्न थालेकोले झीङ्गा कीराको आक्रमणले दानालाई क्षति गर्ने हुनाले सुन्तलाको दाना अनि बोटलाई सुरक्षित राख्न आवश्यक सामग्री साथै कीटनाशक वितरण गरिएको बताए। यता आवश्यक सामग्री प्रदान गरिदिएकामा स्थानीय कृषकहरूले हर्ष प्रकट गर्दै सभासद मिलेस राई अनि विभागीय अधिकारीहरूप्रति आभार प्रकट गरेका छन्।