लागुऔषधी दुरुपयोग तथा अवैध कारोबार नियन्त्रणसम्बन्धी छलफल बैठक

मङ्गन जिल्लाअन्तर्गत जिल्ला प्रशासनिक केन्द्रमा आज जिल्लास्तरीय एनसीओआरडी समितिद्वारा लागुऔषधी दुरुपयोग तथा अवैध कारोबार नियन्त्रणसम्बन्धी छलफल बैठक सम्पन्न भयो। उक्त बैठकको अध्यक्षता मङ्गन जिल्लाका अतिरिक्त जिल्लापाल पेमावाङ्छेन नामकार्पाले गरेका थिए। कार्यक्रममा मङ्गनका पुलिस अधीक्षक सोनामदेच्छु भोटिया, अतिरिक्त पुलिस अधीक्षक मणिकुमार तामाङ, मङ्गन महकुमा अधिकारी सन्दीपकुमार, प्रमुख जिल्ला स्वास्थ्य अधिकारी डा. टेम्पो टी. कालिओन तथा एनसीओआरडी समितिका अन्य सदस्यहरूको उल्लेखनीय उपस्थिति रहेको थियो।
बैठकमा मङ्गन जिल्लाका अतिरिक्त जिल्लापाल पेमावाङ्छेन नामकार्पाले उपस्थित बैठकलाई सम्बोन्धन गर्दै मङ्गन जिल्लाका सम्पूर्ण विभागलाई निर्धारित गतिविधिहरू प्रस्तुत गर्दै राज्य सरकारले लागुऔषधी दुरुपयोग तथा अवैध कारोबार नियन्त्रणका लागि आवश्यक पहलबारे जानकारी गराए। यसअतिरिक्त उनले सम्बन्धित सम्पूर्ण विभाग र राज्यका छवटै जिल्लाका जिल्लापालहरूलाई अवैध कारोबार नियन्त्रणका उपायहरू अपनाउन निर्देशन जारी गरेको पनि जानकारी गराए। यसका साथै नामकर्पाले सम्बन्धित समिति तथा अन्य सरोकारवालाबाट अपेक्षित कार्य योजनामाथि विस्तृत छलफल गर्दै सरकारी कर्मचारीहरूबिच लागुऔषधी दुरुपयोगसम्बन्धी कडा निरीक्षण गर्नु पर्ने आवश्यकतामाथि पनि जोड दिए।