स्थानीय शिल्पकार तथा मजदुरहरूलाई प्राथमिकता दिइन पर्ने माग

धजे बस्ती शिल्पकार एवं मजदुर संगठनले आइतबार आफ्नो सांगठनिक सभा आयोजन गरेको थियो। सभामा संगठनका अध्यक्ष बुद्ध राई, महासचिव नित्यम शिरेलसहित सम्पूर्ण सदस्यहरुको उपस्थिति रहेको थियो। सभामा विशेषगरी क्षेत्रमा शिल्पकारिता र अन्य मजदुरी कार्यलाई कसरी संगठित ढंगले अघि बढाउने भन्ने विषयमा विस्तृत छलफल भएको थियो। यस क्रममा संगठनका मिडिया प्रभारी देवराज भित्रिकोटीले स्थानीय शिल्पकार तथा मजदुरलाई प्राथमिकता नदिएर बाहिराबाट श्रमिक ल्याइनु आर्थिक र सामाजिक दृष्टिले क्षेत्रका लागि प्रतिकूल भएको बताएका थिए। उनले बाहिरबाट आउने प्रवृत्तिका कारण बालबालिकाको अपहरणसमेत बढ्दो अवस्थामा रहेको चिन्ता व्यक्त गरे। संगठनका महासचिव नित्यम शिरेलले आफ्नो सम्बोधनमा स्थानीय रोजगारीलाई प्राथमिकता दिनुपर्नेमा जोड दिँदै भने, “यदि कसैले धजे क्षेत्रमा बाहिरबाट शिल्पकार वा मजदुर ल्याउन चाहन्छ भने, पहिले स्थानीय शिल्पकार संगठनलाई जानकारी दिनुपर्नेछ। त्यसपछि मात्र आवश्यक कागजात परीक्षण गरेर काम गर्न दिने व्यवस्था हुनेछ। साथै उनले स्थानीय काम र योजनामा स्थानीय शिल्पकार र श्रमिकलाई प्राथमिकतामा राखेर काम दिने आह्वान गरे। संगठनले सामूहिक एकता र आत्मनिर्भरता मार्फत क्षेत्रको आर्थिक–सामाजिक सुदृढीकरण गर्ने संकल्प व्यक्त गरेको छ।