अदालतहरुमा दैनिकी कामकुरो बिहीबारदेखि सामान्य

विनाशर्त लिखित माफीनामा र स्थानान्तरण तय भएपछि जिल्ला अनि अन्य अदालतहरुमा दैनिकी कामकुरो बिहीबारदेखि पुन: सामान्यरुपले चलिरहेको छ।
यसबारे अवगत गराउँदै दार्जीलिङ बार एसोसिएसएनले अर्कोतिर भाषालाई केन्द्र गरेर मङपु अदालतको घटनाविरुद्ध एसोसिएसनको साथ खडा हुने सबै राजनैतिक दलहरुप्रति आभार व्यक्त गरेको छ। भारतबाहिरको नेपाली भाषामा अदालतभित्र बोल्न नपाइने अधिवक्ताहरुसामु मङपु अदालतका न्यायिक दण्डाकारीले अभिव्यक्ति पोखेपछि विरोधमा ओर्लिएको दार्जीलिङ बार एसोसिएसनले मङ्गलबार एकदिन जिल्लाभरिका अदालतमा हुने कार्य प्रणाली वहिष्कार गरेको थियो। यसलाई लिएर जिल्ला न्यायाधीश टोली र बार एसोसिएसनबीच बुधबार बसेको बैठकको उक्त सहमतिबारे जानकारी गराउँदै अदालतमा हुने कामकुरो सदा झैं चलेको पदाधिकारीहरले अवगत गराएका छन्।