सङ्गठनलाई सुदृढ बनाउन सासंदसँग बैठक

खरसाङ,7 जुलाई(निसं): भारतीय जनता पार्टी(भाजपा) ले पहाड़मा पार्टी अझ दह्रिलो र सुदृढ़ बनाउने विभिन्न योजनाहरू तयार पारिरहेको छ भने नयाँ सदस्यहरूलाई जोड्ने कार्य पनि गरिरहेको छ। यसै विषयलाई लिएर सोमवार पार्टीका केही नेतृत्वहरूले सांसद राजु विष्टसँग सिलगढ़ीमा भेट गरेको जानकारी प्राप्त भएको छ। यस भेटमा भाजपा दार्जीलिङ जिल्ला महासचिव सुजेन्द्र राई, खरसाङ विधानसभा इञ्चार्ज आरबी लामा, सामाजिक सञ्जाल प्रमुख चन्दन प्रसाद, युवा जिल्ला सचिव विनय कुमार प्रसाद तथा अधिवक्ता रमेश अग्रवाल उपस्थित थिए। बैठकमा संगठन सुदृढ़ बनाउने, स्थानीय जनसमस्या बुझ्ने र भविष्यका योजनाहरू तय गर्ने विषयमा सकारात्मक र उत्साहजनक कुराकानी भएको विनय कुमार प्रसादले जानकारी गराएका छन्। तिनले सबैको साथ र मार्गदर्शनले पार्टीलाई खरसाङ क्षेत्रमा अझ सशक्त बनाउने आशा लिएको पनि जनाएका छन्।