सुपर मार्केट स्थित रोड किनार डम्पिङ ग्राउण्ड जस्तै बन्दैछ

खरसाङ, (निसं) खरसाङ्को पार्क लोकेशनस्थित सुपर मार्केटको पेटी तथा मन्टभियट रोड किनारमा फोहोर-मैला नियमित थुपारिने गरिएकोले यो स्थान डम्पिङ ग्राउण्ड जतिकै बनेको छ। यहाँ प्रायः नै फोहोर-मैलाको थुप्रो देखिन्छ। कुनै कुनै समय फोहोर-मैलाको थुप्रो बढ़ेर निकै माथिसम्म चुलिएको अवस्थामा देखिन्छ भने भुस्याहा कुकुरहरूले फोहोर-मैला सड़क भरी छरिएको अवस्थामा पनि पाइन्छ। यहाँ थुपारिएको फोहोर-मैला सड़िएर पैदल हिँड़ने मानिस, नजिकैको सेण्डिकेटका सदस्यहरू समस्याम पर्ने गरेका छन्‌‍। शुक्रवार यस स्थानमा यस्तै फोरोह-मैलाको थुप्रो रहेको थियो, त्यहाँका कतिपय मानिसहरूले तीन दिनदेखि यहाँको फोहोर-मैला नउठाइएको बताए। बोरामा भरेर राखिएको उक्त फोहोर-मैला छेउछाउका मानिसहरूले फालेका साथै अन्य स्थानबाट नगरपालिका कर्मीहरूले ल्याएर त्यहाँ थुपारेको पनि मानिसहरूले बताए। यस स्थानमा फोहोर-मैला थुपारिने क्रमलाई बन्द गरिन पर्ने स्थानीय साथै यो बाटो भएर हिँड़ने मानिसहरूको माग छ।